*جھنگ(جاوید اعوان سے)۔محکمہ تعلیم میں پروموشن کا عمل تنازعات سے پاک بنانے کے لیے انقلابی اقدامات، اساتذہ کی اسناد کی تصدیق لازمی*

*جھنگ(جاوید اعوان سے)۔محکمہ تعلیم میں پروموشن کا عمل تنازعات سے پاک بنانے کے لیے انقلابی اقدامات، اساتذہ کی اسناد کی تصدیق لازمی*
ڈسٹرکٹ ایجوکیشن اتھارٹی (ڈی ای اے) جھنگ نے اساتذہ کی محکمانہ ترقیوں کے عمل کو شفاف، غیر متنازعہ اور میرٹ کے مطابق بنانے کے لیے اہم ترین اقدامات کا فیصلہ کیا ہے۔ دفتر سیکرٹری ڈسٹرکٹ پروموشن کمیٹی نے ای ایس ٹی (بی ایس 15) سے ایس ایس ٹی (بی ایس 16) کے عہدوں پر ترقی کے لیے امیدوار اساتذہ کی تعلیمی و پیشہ ورانہ دستاویزات، بالخصوص میٹرک کی اسناد کی محکمانہ تصدیق کو لازمی قرار دے دیا ہے۔
​ذرائع کے مطابق پروموشن کے عمل کو قانونی پیچیدگیوں سے بچانے کے لیے سینیارٹی لسٹوں کی شفافیت پر خصوصی توجہ دی جا رہی ہے۔ اگرچہ نومبر 2025 میں تحصیل وائز ڈیٹا کی تصدیق کے بعد دسمبر میں فائنل سینیارٹی لسٹیں شائع کی گئی تھیں، تاہم اساتذہ کی جانب سے اٹھائے گئے اعتراضات کے پیش نظر مورخہ 15 جنوری 2026 کو ناقص ڈیٹا پر مشتمل لسٹیں اصلاح کے لیے متعلقہ دفاتر کو واپس بھجوا دی گئی تھیں۔
​غیر متنازعہ پروموشن کے لیے مجوزہ لائحہ عمل:
محکمانہ پروموشن کو سو فیصد شفاف بنانے کے لیے دفتر سیکرٹری ڈسٹرکٹ پروموشن کمیٹی نے درج ذیل اہم نکات پر مشتمل حکمت عملی اپنائی ہے:
​دستاویزی ریکارڈ کی طلب: متعلقہ دفاتر سے سینیارٹی لسٹوں کے دوبارہ اجراء کا مکمل ڈیٹا، ڈی ڈی اوز کی جانب سے تصدیق شدہ ریکارڈ اور عبوری سینیارٹی لسٹوں کے نوٹیفیکیشنز طلب کر لیے گئے ہیں۔
​تاریخی ریکارڈ کی چھان بین: ڈی ای او (مردانہ) کے اگست 2024 اور فروری 2025 کے مراسلہ جات کی روشنی میں عارضی سینیارٹی ریکارڈ کی مکمل اسکروٹنی کی جائے گی۔
​گریجوایٹ انگلش ٹیچرز کا معاملہ: سیکرٹری تعلیم پنجاب کے سال 2004 اور 2005 کے احکامات کے مطابق گریجوایٹ انگلش ٹیچرز کی مستقل تعیناتی اور ان کی سینیارٹی (بی ایس 14 اور بی ایس 16) کی ریگولیشن ونگ (S&GAD) کی ایڈوائس کے مطابق چھان بین ہوگی۔
​سینیارٹی میں شمولیت کا جائزہ: سال 1995 سے موجود سینیارٹی لسٹوں میں بی ایس 09 سے بی ایس 14 میں مستقل تعیناتی حاصل کرنے والے اساتذہ کے اندراج کے ریکارڈ کو بھی محکمہ تعلیم کے 2007 اور 2009 کے مراسلہ جات کی روشنی میں چیک کیا جائے گا۔
​تعلیمی حلقوں نے ڈی ای اے جھنگ کے ان اقدامات کو سراہتے ہوئے امید ظاہر کی ہے کہ ان فیصلوں سے نہ صرف حق دار اساتذہ کو ان کا حق ملے گا بلکہ محکمہ تعلیم کی تاریخ میں شفافیت کی ایک نئی مثال قائم ہوگی۔